Bayden hər şeyi Putinə verdi | Trampdan təhqir dolu sözlər

ABŞ Prezidenti Cozef Bayden konqresdə çıxışı zamanı Rusiyaya xəbərdarlıq edib. Deyib ki, rəsmi Vaşinqton Ukraynadan geri çəkilməyəcək.

İclasda ölkəsinin Ukrayna ilə bağlı planlarından danışan amerikalı lider rusiyalı həmkarı Vladimir Putinə söz atmağı da unutmayıb.

"Mən bunu konqresə də bildirirəm, biz Putinə qarşı çıxmalıyıq. Mənə ikitərəfli milli təhlükəsizlik qanun layihəsini göndərin. Tarix sözün əsl mənasında bizi izləyir. Bütün dünya bizi izləyir. ABŞ əlini üzsə, Ukraynanı riskə atmış olacaq. Bütün Avropa təhlükə altındadır.

Dünyamızın azadlığı risk altında olacaq, digər müttəfiqlər bizə qarşı təxribatları törətmək üçün özlərində cəsarət tapacaqlar. Uzun müddətdir tanıdığım Prezident Putinə mesajım bu qədər sadədir: Biz Ukraynadan uzaqlaşmayacağıq, oranı tərk etməyəcəyik. Mən sizə baş əyməyəcəyəm!", – o bildirib.

Baydenin bu açıqlamasına ABŞ-nin sabiq prezidenti Donald Tramp səssiz qalmayıb. O, Ağ Ev rəhbərinin səsləndirdiyi fikirləri sərt tənqid edərək onun Rusiyaya və Çinə çoxdan baş əydiyini və onların oyuncağına çevrildiyini deyib:

"Bayden iddia etdi ki, mən hakimiyyətdə olan zaman Rusiya liderinin qarşısında baş əymişəm. Lakin o, Ukrayna da daxil olmaqla hər şeyi Rusiyaya verdi. Mən "Nord Stream 2"ni aldım, o isə başqalarına təhvil verdi! Bayden Putinin, Si Cinpinin və demək olar ki, istənilən liderin oyuncağıdır".