Baydenin vida məktubunda nə yazılıb? | Tramp ənənəni pozdu

ABŞ-də qeyri-adi ənənə var. Prezidentlik müddəti başa çatan prezident özündən sonra gələn yeni dövlət başçısına məktub ünvanlayır və o məktubu Ağ Evin “Oval” otağındakı yazı masasının çəkməcəsinə qoyur. Yeni prezidentin də iş otağına daxil olanda ilk işi həmin məktubu oxumaq olur.

Yanvarın 20-də inaqurasiya mərasimi baş tutan Donald Tramp andiçmədən dərhal sonra Ağ Evdə jurnalistlər üçün brifinq təşkil edib. O, bir neçə jurnalistin suallarını cavablandırdıqdan sonra sabiq prezident Cozef Baydenin onun üçün yazdığı vida məktubunu əlinə alıb.

Adəti üzrə sözügedən məktub media nümayəndələri qarşısında oxunmalı olduğu halda D.Tramp onu səsləndirməkdən imtina edib.

“Çox istərdim ki, bu məktubu birlikdə oxuyaq, amma icazənizlə mən onu təklikdə oxumaq istəyirəm. Əgər uyğun olarsa, sizin üçün də səsləndirərəm. Bu məktubun içindən nə tipli yazı çıxacağı bəlli olmaz”, – deyə o bildirib.

Xatırladaq ki, bu ənənə Ağ Evdə təsadüfən yaranıb. Ronald Reyqan prezidentlik müddətini başa vurduqdan sonra varisi Corc Buşa ürək sözləri ilə dolu bir məktub yazıb. Məktubda Amerikanı güvənli əllərə ötürəcəyinə dair əminliyini vurğulayıb.

İllərlə davam edən bu ənənənin daha bir maraqlı tərəfi isə ondan ibarətdir ki, 2021-ci ildə prezident postunu tərk edən D.Tramp da C.Bayden üçün məktub buraxmışdı. Həmin illərdə də C.Bayden məktubun mətnini açıqlamasa da, “D.Tramp çox səxavətli bir məktub yazıb” ifadəsini deməklə kifayətlənmişdi.