Biz bəşəriyyətə xidmət edirik | İsrailin Baş naziri

“İranın ali lideri Əli Xameneini hədəf almaq İsrail və İran arasında davam edən döyüşü qızışdırmayacaq, əksinə, sona çatdıracaq”.

Bunu İsrailin Baş naziri Benyamin Netanyahu ABC News-a açıqlamasında deyib.

“İsrail həqiqətən də ali lideri hədəf alacaqmı?” sualına Baş nazir “Etməli olduğumuzu edəcəyik” cavabını verib.

“Yaxın Şərqdə hər kəsi qorxudan, Səudiyyə Ərəbistanındakı Aramco neft yataqlarını bombalayan, hər yerdə terror, təxribat törədən bu rejimlə yarım əsrlik münaqişəmiz var. Əbədi müharibə İranın istədiyi şeydir və bizi nüvə müharibəsi astanasına gətirir. Əslində, İsrailin etdiyi bunun qarşısını almaq, təcavüzə son qoymaqdır və biz bunu ancaq şər qüvvələrə qarşı durmaqla edə bilərik”, – deyə o qeyd edib.

Netanyahu İranın ən yaxşı nüvə alimlərini hədəf aldıqlarını və onların əsasən Hitlerin nüvə komandası olduğunu vurğulayıb.

“İranın nüvə proqramını aradan qaldırmağa çalışan İsraili dəstəkləmək ABŞ-nin marağındadır. Hədəf bu gün Təl-Əvivdir, sabah Nyu York. Bax mən “Öncə Amerika”nı başa düşürəm, “Ölü Amerika”nı isə anlamıram. Bu insanların istədiyi budur. “Amerikaya ölüm” şüarları səsləndirirlər. Beləliklə, biz bəşəriyyətə xidmət edən addımlar atırıq və mən Prezident Trampın dəstəyini dərindən qiymətləndirirəm”, – deyə Netanyahu bildirib.