Biz işsiz qalmışıq! | Ermənilər ayağa qalxdı

Ermənilər yenə etiraz aksiyası keçirib.

Bu dəfə onlar İrəvanın böyük yükdaşıma məntəqələrinin yerləşdiyi Çarbax rayonunda toplaşıblar. Onlar hakimiyyətdən xarici ölkələrə daşınmanın tənzimlənməsi üçün tədbirlər görməyi tələb ediblər.

Bu barədə erməni mediası məlumat yayıb. Bildirilib ki, erməni şirkətləri Türkiyə və Gürcüstan daşıyıcıları ilə qeyri-bərabər rəqabət şəraitindən şikayətlənib.

İddia ediblər ki, müxtəlif ölkələrdə yük tarifinə daxil olan ixrac və idxalın dəyəri fərqlidir. Ermənistanda ixrac idxaldan ucuz, Gürcüstanda isə əksinədir.

Aksiyaçıların sözlərinə görə, bu fərqdən istifadə edən gürcü və türk yük daşıyıcıları Ermənistan da daxil olmaqla bütün daşıma sektorunu öz nəzarətlərinə götürüblər.

“Türkiyə vətəndaşları Gürcüstanda kütləvi şəkildə daşıma şirkətləri açmağa, türk sürücülər gətirməyə və gürcü ekspeditorlar ilə birlikdə üçüncü ölkəyə daşıyıcı kimi Ermənistan bazarına daxil olmağa başlayandan biz işsiz qalmışıq”, – deyə aksiya iştirakçıları bildiriblər.