Bizi başqa müharibələr gözləyir | Hakan Fidandan Qəzza açıqlaması

“Qəzza zolağında mövcud böhran yeni hərbi münaqişələrə səbəb ola bilər”. Bunu Türkiyənin xarici işlər naziri Hakan Fidan deyib.

O, Qəzza zolağında münaqişənin “iki dövlətli həll” yoluna gəlməsinin vacibliyindən danışıb.

“Qəzzada baş verən faciədən dərs almasaq, bu, sonuncu müharibə olmayacaq. Bizi başqa müharibələr və göz yaşları gözləyir”, – deyə nazir xəbərdarlıq edib.

Bu arada, Qahirədə Qəzza üzrə danışıqlarda ciddi irəliləyiş əldə olunub. HƏMAS İsraillə atəşkəs razılaşmasında maraqlı olduğunu bildirib. Bu barədə hərəkatın “Telegram” kanalında məlumat verilib.

Qeyd olunur ki, HƏMAS Qahirədə keçirilən beştərəfli danışıqlarda Misirin atəşkəs təklifinə cavabı artıq çatdırıb. Hərəkatın rəhbərliyi Fələstin xalqının milli tələblərini təmin edəcək bir razılaşma əldə etmək niyyətində olduğunu bildirib.

Bu cür tələblərə İsrailin atəşkəs elan etməsi, SAXAL qüvvələrinin bütün Qəzza zolağından çıxarılması, humanitar yardımın həcminin artırılması, zolağın yenidən qurulmasına başlanması və əsir mübadiləsi sazişinin başa çatdırılması daxildir. Bu bəyanatla Qahirədə danışıqların növbəti mərhələsi başa çatıb.