Blinkendən Haniyənin ölümü ilə bağlı vacib açıqlama

HƏMAS-ın siyasi liderinin öldürülməsinə baxmayaraq, Qəzzada daimi atəşkəsin əldə olunması prioritet olaraq qalır.

Bunu ABŞ-nin Dövlət katibi Entoni Blinken Sinqapurda keçirilən forumda İsmayıl Haniyənin ölümünün HƏMAS və İsrail arasında danışıqlara potensial təsiri ilə bağlı suala cavab olaraq deyib.

"Heç nə atəşkəsə nail olmağın əhəmiyyətini azaltmır. Hər hansı hadisənin buna necə təsir göstərə biləcəyi barədə spekulyasiya etməyəcəyəm. Fikir söyləmək çox çətindir və mən ötən illər ərzində öyrənmişəm ki, bir hadisənin başqa bir hadisəyə təsiri barədə heç vaxt fərziyyə söyləmək olmaz. Bildiyim atəşkəsin əldə olunmasının davamlı məcburi olmasıdır", – deyə o əlavə edib.

"Biz atəşkəsə çatmaq üçün lazım olan müddət ərzində bu istiqamətdə işləməyə davam edəcəyik. Qəzzada fələstinlilərin iztirablarına son qoymağa kömək etmək həyati əhəmiyyət daşıyır. Aralarında bir sıra amerikalıların da olduğu girovların evlərinə qaytarılması həyati əhəmiyyət kəsb edir", – deyən E.Blinken əlavə edib ki, Cozef Bayden administrasiyası HƏMAS-ın siyasi lideri İsmayıl Haniyənin öldürülməsində iştirak etməyib və xəbərsiz olub.