Blinkendən İsrailə qarşı addım | Hesabatda nələr olacaq?

İsrail ilə HƏMAS hərbi qruplaşması arasında müharibə başlayandan bəri rəsmi Vaşinqton hər zaman Təl-Əvivi dəstəkləyib.

Lakin son zamanlar müttəfiqlər arasında fikir ayrılıqlarının artması səbəbindən bu münasibətlərdə müəyyən geriləmə müşahidə olunur.

Yerli medianın yaydığı məlumata görə, ABŞ Dövlət katibi Entoni Blinken ölkə Konqresinə İsrailin Qəzzadakı fəaliyyətini tənqid edən hesabat təqdim edəcək. Bunun səbəbi isə müharibə zamanı İsrail tərəfinin ABŞ istehsalı silahlar ilə cinayətlər törətməsidir.

Bundan əlavə, hesabatda İsrail Müdafiə Qüvvələrinin iştirakı ilə keçirilən əməliyyatlara dair informasiyalar da öz əksini tapacaq.

Qeyd olunub ki, Dövlət katibi Ağ Evin Təl-Əvivlə bağlı narazılıqlarını ifadə edəcək. Eyni zamanda o, beynəlxalq humanitar hüququn pozulması və fələstinlilərə humanitar yardımın çatdırılmasına mane olacaq addımlar İsrail tərəfindən atılarsa, ölkəyə hərbi yardımın dayandırılmasının mümkünlüyünü də qeyd edəcək.

Xatırladaq ki, bundan əvvəl İsrailin Baş naziri Benyamin Netanyahu ABŞ Prezidenti Cozef Baydenlə Qəzza ilə bağlı fikir ayrılıqlarını müzakirə edərək onların aradan qaldırılmasına ümid etdiyini bildirib.