Blinkendən Ukrayna ilə bağlı gözlənilməz etiraf | 2021-ci ildə gizli şəkildə...

ABŞ-nin Dövlət katibi Entoni Blinken ölkəsinin Rusiya ilə birbaşa toqquşmaya yaxın olduğunu düşünmür.

“Biz narahatlıqlarımızı elə bir şəkildə həll etdik ki, bu bizi Rusiya ilə birbaşa münaqişədən çəkindirib. Birbaşa münaqişəyə gəldikdə isə düşünmürəm ki, biz ona yaxınıq, lakin buna çox diqqətlə yanaşmalıyıq”, – deyə o vurğulayıb.

E.Blinken həmçinin qeyd edib ki, Amerika vətəndaşları ABŞ-nin hərbi münaqişələrdə birbaşa iştirakını istəmirlər.

“Amerikalılar bizim müharibələrdə iştirak etməməyimizi və münaqişələrdən qaçmağımızı istəyirlər”, – deyə o qeyd edib.

2024-cü ilin dekabrında Rusiya təhlükəsizlik Şurasının sədr müavini Dmitri Medvedev bildirib ki, Rusiya və ABŞ yaxın əsrdə dost olmayacaq, bir-biri ilə müharibə etmək isə hər cəhətdən bahadır. O, 2 ölkə arasında birbaşa münaqişənin aşkar şəkildə dünya nüvə müharibəsinə çevriləcəyini göstərib.

Bu arada E.Blinken Ukrayna ilə bağlı bir etiraf edib. Dövlət katibi bildirib ki, Birləşmiş Ştatlar münaqişədən xeyli əvvəl Ukraynanı müxtəlif silahlarla, xüsusən də “Stinger” zenit-raket kompleksləri və “Javelin” tank əleyhinə sistemləri ilə təchiz etməyə başlayıb.

“Biz münaqişə başlamazdan xeyli əvvəl, 2021-ci ilin sentyabr və dekabrında gizli şəkildə Ukraynaya çoxlu sayda silah, “Stinger” və “Javelin” kimi sistemlər verdik”, – deyə E.Blinken bildirib.