BMT-dən ürpədici xəbər | Ukraynadakı mülki itkilər rekord həddə çatdı

2025-ci ilin iyul ayında Ukraynada ölən və yaralanan mülki əhalinin sayı son üç ilin ən yüksək həddinə çatıb. Bir ay ərzində 300-ə yaxın insan həlak olub.

BMT-nin hesabatına görə, iyul ayında 286 mülki şəxs həlak olub, 1388 nəfər isə yaralanıb. Bu, 2022-ci ilin may ayından bəri ən yüksək göstəricidir.

İtkilərin təxminən 40 faizi uzaqmənzilli silahlar, xüsusilə raketlər və ölümcül sursatların istifadəsi nəticəsində baş verib. Belə ki, iyulun 31-də Kiyevin raket atəşinə tutulması zamanı paytaxtda genişmiqyaslı işğalın başlamasından bəri dinc əhali arasında ən çox itki qeydə alınıb ‒ 31 nəfər həlak olub, 171 sakin yaralanıb.

İyun ayı ilə müqayisədə iyulda mülki əhali arasında itkilərin artmasının əsas səbəbi kimi cəbhə xətti boyunca hökumətin nəzarətində olan ərazilərdə intensiv döyüşlərin baş verdiyi bildirilib.

Mülki itkilərin ikinci əsas səbəbi isə qısamənzilli dron hücumları olub. Belə hücumlar 2024-cü ilin iyul ayı ilə müqayisədə 24 faiz artaraq 64 ölüm və 337 yaralanmaya səbəb olub.