BMT İsrailin Beyruta hava hücumundan narahatlığını bildirib

BMT Livan və İsrail arasında vəziyyətin gərginləşməsindən, xüsusən də İsrailin Beyruta endirdiyi hava hücumundan son dərəcə narahatdır və tərəfləri maksimum təmkinli olmağa çağırır.

Bunu təşkilatın baş katibinin rəsmi nümayəndəsi Stefan Düjarrik deyib.

“Biz İsrailin Livanla sərhədində vəziyyətin gərginləşməsindən, o cümlədən Beyruta edilən hücumdan son dərəcə narahatıq. Biz bütün tərəfləri dərhal gərginliyi azaltmağa çağırırıq, hər kəs maksimum təmkinli davranmalıdır”, – deyə BMT rəsmisi qeyd edib.

S.Düjarrik əlavə edib ki, Təşkilat həmçinin regionda hərbi əməliyyatların dərhal dayandırılmasına çağırır.

Bu arada, İsrailin Beyruta hava hücumu nəticəsində ölən və yaralıların sayı artıb. Belə ki, son hava hücumu zamanı 12 nəfər ölüb, 66 nəfər yaralanıb. Bu barədə Livan Səhiyyə Nazirliyi məlumat yayıb. Livan mediasının məlumatına görə, aviazərbə “Hizbullahın qalası” kimi tanınan Dahiyə bölgəsinə endirilib.