BMT-nin mənzil qərargahında bayraqlar endirilib

Birləşmiş Millətlər Təşkilatının Nyu-Yorkdakı mənzil qərargahında dalğalanan bayraqlar endirilib. Kompleksdə BMT-yə üzv olan 193 dövlətin bayrağı Nyu-Yorkda havanın kirliliyi səbəbi ilə aşağı salınıb.

BMT baş katibinin sözçüsü Stefan Dujarik bildirib ki, beynəlxalq təşkilat öz texniki işçilərini lazımsız risklərdən qorumaq üçün belə bir qərar alıb.

“Bayraqlarla bağlı alınmış xüsusi qərarlara uyğun prosedurlar var. Bunlar güclü yağışlar, şiddətli küləklər, soyuq temperatur müşahidə etdiyimiz zaman tətbiq olunur. Burada çalışdığım 20 il ərzində ilk dəfədir ki, bu qərarın tətbiq edildiyinə şahid oluram. Havanın keyfiyyəti ilə bağlı problemlərə görə biz təhlükəsizlik işçilərimizi lazımsız risklərə atmaq istəmirik”, – deyə sözçü bildirib.

Qeyd edək ki, Kanadadakı kütləvi meşə yanğınları səbəbindən Nyu-Yorkda havanın keyfiyyəti təhlükəli həddə çatıb.