BMT Qəzzadakı vəziyyətdən narahatdır

“Biz Qəzza şəhərinin sistemli şəkildə məhv edilməsini müşahidə edirik”.

Bu fikirləri Birləşmiş Millətlər Təşkilatının Baş katibi Antonio Quterreş səsləndirib.

O, ərazidəki müharibənin mənəvi, siyasi və hüquqi baxımdan dözülməz olduğunu bildirib:

“Bu gün Qəzzada baş verənlər dəhşətlidir. Biz məhəllələrin genişmiqyaslı şəkildə dağıdılmasını, indi isə Qəzza şəhərinin sistemli şəkildə məhv edilməsini müşahidə edirik. Mülki şəxslər kütləvi şəkildə öldürülür və mən Birləşmiş Millətlər Təşkilatının Baş katibi olduğum vaxtdan bəri heç bir münaqişədə bu cür halı xatırlamıram”.

Baş katib hesab edir ki, iki dövlətli həll İsrail-Fələstin münaqişəsini həll etmək üçün yeganə əlverişli yoldur:

“Biz beynəlxalq ictimaiyyəti mümkün qədər səfərbər etməliyik ki, iki dövlətli həll üstünlük təşkil etsin. Sual sadədir: alternativ nədir? İnsanların əsas hüquqlardan məhrum edildiyi bir dövlət? İnsanların torpaqlarından çıxarıldığı bir dövlət? Bu, 21-ci əsrdə mümkündürmü? Bu, 21-ci əsrdə qəbulolunandırmı? Məncə, İsrail anlamalıdır ki, Fələstin xalqı üçün bir dövlətli həll tamamilə dözülməzdir. Bu səbəbdən iki dövlətli həll sülhü qorumaq üçün yeganə və real alternativ olaraq qalır”.

A.Quterreş BMT-də İsrailin Baş naziri Benyamin Netanyahu və ABŞ Prezidenti Donald Trampla görüşməyə hazır olacağını da bildirib.