Böyük Britaniya və Almaniya Moskvaya təzyiqi artırır | 2-ci Dünya müharibəsindən sonra ilk sənəd

Böyük Britaniya və Almaniya arasında II Dünya müharibəsindən sonra, 1945-ci ildən bu yana ən böyük saziş imzalanıb.

Belə ki, Böyük Britaniyanın Baş naziri Kir Starmer və Almaniyanın Kansleri Fridrix Merts ikitərəfli əlaqələrin genişləndirilməsi məqsədilə müqaviləyə qol çəkiblər.

Sənədə görə, silahlı hücum zamanı 2 ölkənin bir-birinə yardım etmək öhdəliyi var. Bu əməkdaşlığın razılaşdırılmasını “London-Berlin münasibətləri üçün tarixi bir gün” hesab edən F.Merts Britaniyanın Avropa İttifaqından çıxmasına görə təəssüfləndiyini də ifadə edib.

K.Starmer isə Donald Trampın Avropa İttifaqına baxışı və Ukraynaya yardım məsələsinin dalana dirəndiyi bir məqamda Böyük Britaniya ilə Almaniyanın həmişəkindən daha da yaxınlaşacağını bildirib.

Məlumat üçün bildirək ki, yeni tərəfdaşlıq silah satışı, ticarət, nəqliyyat və miqrasiya kimi sahələri əhatə edəcək. Sənədin hərbi əməkdaşlıq hissəsi Avropada Rusiyanın mümkün aqressiyası ilə birgə mübarizə xarakterlidir.