Bu halda hər şey dəyişəcək | Rusiyada yeni səfərbərlik başladı?

“İstisnasız olaraq hamı üçün səfərbərlik Rusiya Ukraynaya rəsmi müharibə elan etdiyi halda həyata keçiriləcək”.

Bu sözləri Dövlət Dumasının Müdafiə Komitəsinin üzvü Viktor Sobolev iclasda çıxışı zamanı deyib.

O bildirib ki, ümumi səfərbərlik olarsa, üçdən çox uşağı olan, Orta Asiya ölkələrində yaşayan Rusiya vətəndaşları da cəbhəyə göndəriləcək.

V.Sobolev onu da vurğulayıb ki, ümumi səfərbərlik halında hərbi-sənaye kompleksinin işçiləri və ölkənin ərzaq təhlükəsizliyini təmin edənlər rezervasiyalara arxalana biləcəklər.

“Qida ehtiyatımız kifayət qədərdir. Təbii ki, mövcud durumda cəbhəyə göndərilmədən azad olacaq iki kateqoriya insan var: sənaye və hərbi texnika istehsal edən zavodların işçiləri və ön cəbhəni lazımi resurslarla təmin edənlər. Qalan hamı bir nəfər kimi ön cəbhəyə yollanacaq. Amma buna hələ ki gərək yoxdur”, – deyə o bildirib.

Xatırladaq ki, bu yaxınlarda Dövlət Dumasının Müdafiə Komitəsi çoxuşaqlı atalara möhlət verilməsini nəzərdə tutan qanun layihəsinin rədd edilməsini tövsiyə edib.