Bu işçilər köçürüləcək | Dünyaca nüfuzlu təşkilat niyə böhran içindədir?

Birləşmiş Millətlər Təşkilatı əsas departamentlərin birləşdirilməsini və resursların yenidən bölüşdürülməsini nəzərdə tutan köklü restrukturizasiyanı nəzərdən keçirir.

“Report” xəbər verir ki, bu barədə BMT-nin baş katibi Antonio Quterreşin rəhbərlik etdiyi işçi qrupunun hazırladığı məxfi altı səhifəlik memoranduma istinadən “Reuters” agentliyi məlumat yayıb.

Sənəd onlarla agentliyin dörd əsas sahə üzrə birləşdirilməsini təklif edir: sülh və təhlükəsizlik, humanitar məsələlər, davamlı inkişaf və insan hüquqları.

İslahat həmçinin bir sıra işçilərin Cenevrə və Nyu-Yorkdan daha ucuz şəhərlərə köçürülməsi də daxil olmaqla işçilərin ixtisarını əhatə edir.

Təşəbbüs BMT-nin maliyyə böhranı ilə əlaqələndirilir. Belə ki, təşkilatın əsas donoru olan ABŞ-nin müntəzəm büdcəyə 1,5 milyard dollar, sülhməramlı əməliyyatlara isə 1,2 milyard dollar borcu var.

Amerika yardımının azaldılması artıq Humanitar Məsələlər İdarəsinin əməkdaşlarının 20%-nin işdən çıxarılmasına səbəb olub və Beynəlxalq Miqrasiya Təşkilatında 6000 iş yeri ixtisara düşə bilər.

A.Quterreş islahatı parçalanmış strukturlara və bürokratiyaya cavab kimi qiymətləndirib, lakin BMT-nin yüzlərlə əməkdaşı mayın 1-də Cenevrədə ixtisarlara etiraz edib.

Yekun restrukturizasiya təklifləri mayın 16-da təqdim edilməlidir.