Bu ölkədə valideynlər körpəyə istədiyi adı qoya bilmir

İsveçdə uşaqlara qoyulacaq adlarla bağlı maraqlı bir qadağa var.

Belə ki, körpəyə istədiyi adı qoymaq valideynlərin ixtiyarına buraxılmayıb.

Bu ölkədə qüvvədə olan “Ad Qanunu”na əsasən, valideynlər övladının doğulmasından sonra üç ay ərzində seçdikləri ad barədə İsveç Vergi İdarəsinə məlumat verməlidirlər. Əks halda cəza tətbiq olunur.

1901-ci ildə nəşr olunan “Ad Qanunu” ilə başlayan bu tənzimləmə zadəgan ailələrinin adlarını qorumaq və zadəgan olmayan ailələrin bu adlardan istifadə etməsinin qarşısını almaq məqsədi daşıyıb.

1982-ci ildə qüvvəyə minən “Ad Qanunu” ilə mövzu daha əhatəli hala gətirilib. Veriləcək ad uşağa narahatlıq yaratmamalı, ümumi əxlaqa uyğun olmalıdır.

Bundan başqa, məşhur soyadlar, tarixi şəxsiyyətlərin və zadəganların işlətdiyi adlardan istifadə etmək olmaz.

Başqa bir qayda ondan ibarətdir ki, boşanmış valideyn sonradan doğulan övladına əvvəlki nikahdan olan uşağının adını verə bilməz. “Allah” adı dini səbəblərə görə qəbul edilmir. “Metallica”, “Superman” və “Ford” kimi adlar da qadağan olunub. Uşaqlara “Google” adının verilməsinə isə icazə var.