Bu, Ukraynanın qırmızı xəttidir! - Dünyanın diqqəti bugünkü Zelenski-Tramp danışığında

Ukrayna Prezidenti Volodimir Zelenski ABŞ Prezidenti Donald Tramp ilə telefon danışığı aparacağını açıqlayıb.

O bu barədə Finlandiya Prezidenti Aleksandr Stubb ilə keçirdiyi mətbuat konfransında məlumat verib.

“Bu gün Prezident D.Tramp ilə təmasım olacaq. Biz onunla detalları müzakirə edəcəyik. Düşünürəm ki, bu, növbəti addımlarla bağlı olacaq. Artıq komandalarımız arasında çox yaxşı görüş baş tutub. Məncə, proses düzgün istiqamətdə gedir və mən D.Trampın Vladimir Putinlə danışığının detalları barədə ondan eşidəcəyimi düşünürəm”, – V.Zelenski deyib.

Ukrayna lideri bildirib ki, gələcək danışıqlarda ərazi məsələsi ən həssas və çətin məqamlardan biri olacaq. V.Zelenski vurğulayıb ki, bu kimi mövzuların müzakirəsi üçün dənizdə və havada tam sakitlik rejimi təmin edilməlidir.

“Bizim üçün qırmızı xətt müvəqqəti işğal olunmuş Ukrayna ərazilərinin Rusiyanın tərkib hissəsi kimi tanınmasıdır. Biz bunu qəbul etməyəcəyik”, – deyə V.Zelenski qeyd edib.

Bu açıqlamalar D.Tramp və V.Putin arasında keçirilmiş son telefon danışığından sonra gəlib. V.Zelenskinin D.Tramp ilə müzakirələrinin Ukraynaya hərbi yardımın davam etdirilməsi, atəşkəs məsələləri və gələcək sülh danışıqlarının istiqamətləri kimi mühüm mövzuları əhatə edəcəyi gözlənilir.

Gözlər indi D.Tramp-V.Zelenski görüşündən sonra veriləcək rəsmi açıqlamalara çevrilib. ABŞ-nin bu münaqişədəki mövqeyi və D.Trampın V.Putinlə razılaşmaları Ukraynanın gələcək strateji addımlarına təsir edə bilər.