Bu yaxşılığınız unudulmayacaq | Baydendən NATO ölkələrinə çağırış

ABŞ-nin paytaxtı Vaşinqtonda NATO-ya üzv 32 dövlətin, tərəfdaş ölkələrin və Avropa İttifaqının iştirakı ilə NATO Sammiti işinə başlayıb.

Alyansın 75 illiyi münasibətilə keçirilən tədbir ABŞ Prezidenti Cozef Baydenin nitqi ilə açıq elan edilib.

Bir çox məsələlərdən danışan Ağ Evin rəhbəri çıxışında təşkilatın yeni üzvlərinə də diqqət çəkib.

“Hörmətli qonaqlar hər biriniz 2024-cü il üzrə keçirilən NATO sammitinə xoş gəlmisiniz. Sizləri burada görmək xoşdur. Bu əlamətdar ildə sizi qəbul etmək, indiyə qədər əldə etdiyimiz hər şeyə geriyə dönüb qürurla baxa bilmək və ortaq gələcəyimizi güclü və qətiyyətli şəkildə təsəvvür etmək çox gözəldir. Biz birlikdə Avropanı müharibənin təsirindən sonra yenidən inşa etdik. Keçmiş düşmənlər həmrəy olub demokratik ölkələrə çevrildilər.

Balkanlarda müharibə başlayanda sülhü bərpa etmək və etnik təmizləməni dayandırmaq üçün münaqişəyə müdaxilə etdik. Sentyabrın 11-də ABŞ-yə hücum ediləndə NATO müttəfiqlərimiz, hamınız alyans tarixində ilk dəfə Beşinci Maddəyə əsaslanaraq, hamı bir ölkə üçün prinsipini həyata keçirdiniz. Amerikalılar bu yaxşılığınızı heç vaxt unutmayacaq.

Bu gün NATO hər zamankindən daha güclüdür. 32 dövlət yumruq kimi birləşib. Finlandiya və İsveç artıq illərlə bizimlə yaxından tərəfdaşlıq edirdilər. İndi onlar rəsmi olaraq NATO-ya üzv olmağı seçdilər. Bu üzvlük 2 ölkənin vətəndaşlarından gələn yüksək istəyin də nəticəsidir. Unutmayın ki, təşkilatın qayəsi həmişə demokratik olmaq olub”, – o əlavə edib.

Qeyd edək ki, 2023-cü ildə Finlandiya, 2024-cü ilin martında isə İsveç alyansa üzv olub.