“Bunun üçün mübarizə aparırıq” | Zelenskidən açıqlama

ABŞ-nin təqdim etdiyi 28 bəndlik sülh planı Ukrayna ilə aparılan məsləhətləşmələrdən sonra 20 bəndə qədər ixtisar edilib.

Bu barədə Ukrayna Prezidenti Volodimir Zelenski Londondan Brüsselə uçan zaman təyyarədə jurnalistlərin suallarını cavablandırarkən bildirib.

V.Zelenskinin sözlərinə görə, sənəddən Ukraynanın maraqlarına uyğun olmayan bəndlər çıxarılıb. O vurğulayıb ki, Vaşinqton kompromis tapmaqda maraqlıdır, lakin ən mürəkkəb məsələ, ərazilərlə bağlı kompromis hələ tapılmayıb.

Prezident qeyd edib ki, Ukrayna nə konstitusiyaya, nə də beynəlxalq hüquqa görə öz torpaqlarını təhvil verə bilər.

“Rusiya israr edir ki, biz əraziləri verək. Biz isə heç nə vermək istəmirik, bunun üçün mübarizə aparırıq”, – V.Zelenski deyib.

O həmçinin təhlükəsizlik təminatları məsələsinə toxunaraq qeyd edib ki, ən güclü təminatlar ABŞ tərəfindən verilə bilər.

V.Zelenskinin sözlərinə görə, Ukrayna tərəfi sülh planının son redaksiyasını 9 dekabr axşamı tamamlayacaq və sənəd ABŞ-yə göndəriləcək. Bu versiya Ukraynanın milli təhlükəsizlik və müdafiə şurasının katibi Rustem Umerovun iştirakı ilə hazırlanır.