Bürclərlə bağlı unikal kəşf | Eramızdan əvvələ aid olan bu tapıntı nəyi göstərir?

"Macquarie" Universitetinin avstraliyalı tədqiqatçıları Misir qayaüstü sənətinə aid mühüm kəşf ediblər.

Məlum olub ki, El-Xoş bölgəsindəki petroqliflərdən biri Oğlaq bürcünü təmsil edir. Bürc simvolunu əks etdirən petroqlifin tapılması unikaldır, çünki əvvəllər Misir qayaüstü sənətində belə təsvirlərə rast gəlinməyib.

Tədqiqatçılar bu simvolun astrologiya ilə əlaqəli olduğunu deyir və düşünürlər ki, bu, mühüm mifologiya elementidir.

Petroqlifi aşkar etmək və öyrənmək üçün alimlər El-Xoş ərazisində çöl işləri aparıblar. Mütəxəssislər ətraflı təhlildən sonra təsvirin Oğlaq bürcünə aid olduğu qənaətinə gəliblər. Tapıntı bürclərin tarixinin öyrənilməsi və Misir mədəniyyəti haqqında yeni informasiya baxımından əhəmiyyət kəsb edir.

Tədqiqatçılar qeyd edirlər ki, Oğlaq bir simvol olaraq Şumer tanrısı Enki və onun Mesopotamiyadakı sonrakı təzahürləri ilə əlaqələndirilib, zodiak ideyaları Yunanıstan və Roma vasitəsilə Misirə nüfuz etmiş ola bilər.

Amma aşkar edilmiş təsvirdə Oğlaq bürcünün düz quyruğu onu sonrakı Roma versiyalarından fərqləndirir. Bu isə alimlərə petroqlifi eramızın II əsrindən əvvəlki dövrə aid etməyə imkan verir. Bundan əlavə, El-Xoşda yunan-Roma motivli qayaüstü incəsənətin başqa nümunələri də tapılıb.