Cəbhədəki mövcud vəziyyət müzakirə olundu

“Latviya PUA Koalisiyasının lideridir”.

Bunu Ukrayna Prezidenti Volodimir Zelenski Latviyanın xarici işlər naziri Bayba Braje ilə görüşdə səsləndirib.

Tərəflər Ukraynaya müdafiə dəstəyi və Latviyanın Ukraynanın Prioritet Ehtiyaclarının Siyahısı (PURL) təşəbbüsündə, eləcə də digər təhlükəsizlik mexanizmlərində iştirakını müzakirə ediblər.

“Latviya bu il Ukraynaya təxminən 12 min pilotsuz uçuş aparatı göndərib və bu, müdafiəmiz üçün mühüm dəstəkdir. Latviyanın PURL təşəbbüsünə verdiyi töhfəni yüksək qiymətləndiririk”, ‒ deyə V.Zelenski bildirib.

Tərəflər həmçinin cəbhədəki mövcud vəziyyət ətarfında fikir mübadiləsi aparıblar. V.Zelenski edilən bütün yardıma, səfərə, xüsusilə də Çerniqovada məktəb və uşaq bağçalarının bərpasındakı roluna görə Latviyaya təşəkkür edib.

“Mövqelərimiz ortaqdır. Rusiyaya qarşı sanksiya təzyiqini gücləndirmək və tərəfdaşlarla müvafiq işi davam etdirmək lazımdır. Latviya bizim yanımızdadır və gələcəkdə də yanımızda olacaq”, ‒ deyə Ukrayna lideri əlavə edib.

Sonda V.Zelenski B.Brajeyə Ukraynanın suverenliyi və ərazi bütövlüyünə verdiyi dəstəyə görə minətdarlıq edib və onu “Xidmətlərə görə” II dərəcəli ordenlə təltif edib.