Cənubi Koreya və ABŞ-dən güc nümayişi

Cənubi Koreya Ordusu ABŞ hərbçiləri ilə birgə aviasiya təlimlərinə başlayıb. Təlimlərdə strateji bombardmançı təyyarədən də istifadə olunub.

Bu barədə Koreya Respublikasının Baş Qərargah Rəisləri Komitəsi məlumat yayıb. Bildirilib ki, manevrlərdə Cənubi Koreyanın F-35A və F-15K qırıcıları, ABŞ-nin isə F-16 döyüş təyyarələri də iştirak edib.

Xatırladaq ki, KXDR Ordusu fevralın 18-də “Hvason” qitələrarası ballistik raketini sınaqdan keçirib. Sınaq Sunan şəhərindəki Beynəlxalq Hava Limanında baş tutub. Rəsmi Pxenyan bildirib ki, son sınaq ölkənin rəqiblərinə qarşı “ölümcül” nüvə hücumu imkanlarını daha da gücləndirmək məqsədi daşıyır. KXDR bu sınağın ABŞ və Cənubi Koreyanın mümkün hərbi təlimlərinə layiqli cavab olduğunu açıqlayıb.

Raketin yüksək bucaq altında atıldığı və maksimum 5770 kilometr hündürlüyə çatdığı, 67 dəqiqəlik uçuş zamanı təxminən 990 kilometr məsafə qət etdiyi və Koreya yarımadası ilə Yaponiya arasındakı sularda əvvəlcədən təyin edilmiş əraziyə düşdüyü bildirilib.