Çexiya Prezidentindən Rusiya-Ukrayna savaşı barədə qalmaqallı açıqlama

“Hazırda Qərbin hərtərəfli dəstəyinə baxmayaraq, Ukrayna çoxsaylı insan itkisi olmadan Rusiyanın işğalındakı ərazilərini azad etmək gücündə deyil. Biz həmin torpaqları heç vaxt Rusiyanın ərazisi kimi tanımayacağıq. Biz sadəcə istəyirik ki, Ukrayna müstəqil, suveren dövlət kimi mövcudluğunu qorusun”.

Bunu Çex Respublikasının Prezidenti Petr Pavel söyləyib.

O bildirib ki, Kreml rəhbəri Vladimir Putinin Ukrayna üzrə danışıqlarda yalnız Ağ Ev rəhbəri Donald Trampı görməsi Avropanın təhlükəsizliyinə təhdiddir.

Petr Pavel əlavə edib ki, Vladimir Putinin bu fikri Avropanı danışıqlar masasından tamamilə uzaqlaşdırmaq deməkdir. O hesab edir ki, Ukraynaya hərbi dəstəyin verilməsi son dərəcə vacibdir.

Petr Pavelin sözlərinə görə, Rusiyanın iqtisadi vəziyyəti hazırda üzləşdiyi təzyiqlərə uzun müddət tam gətirə bilməyəcək. Tez və ya gec Rusiya irəli sürülən bütün şərtləri qəbul edəcək və danışıqlar masasına əyləşərək, müzakirələrdə iştirak edəcək.