Ciddi genetik böhranla üzləşən populyasiya | Təkamülün gizli məqamı

Kembric Universitetinin alimləri müəyyən ediblər ki, müasir insanlar bir yox, azı iki qədim populyasiyadan törəyiblər.

Bu qruplar təxminən 1,5 milyon il əvvəl ayrılıb və 300 min il əvvəl yenidən birləşiblər. İlk qrup müasir insanların genlərinin 80%-ni, ikinci qrup isə 20%-ni formalaşdırıb.

Alimlər genetik məlumatları analiz etmək üçün "cobraa" adlı xüsusi alqoritm hazırlayıblar. Onlar aşkar ediblər ki, ayrılmadan sonra populyasiyalardan biri ciddi genetik böhranla üzləşib və çox az sayda fərd sağ qalıb. Məhz bu populyasiya sonradan müasir insanların genomunun əsasını təşkil edib, eyni zamanda neandertallar və denisovalılar üçün ümumi əcdad qrupu olduğu ehtimal edilir.

Elm adamları "cobraa" metodundan şimpanzelər, delfinlər və yarasalar kimi digər növlərin təkamülünü öyrənmək üçün də istifadə ediblər. Bu yanaşma canlıların mənşəyini daha dəqiq araşdırmağa imkan yaradır.