Çin azyaşlılara qulluq sistemini genişləndirir

Çin hakimiyyəti demoqrafik çağırışlar fonunda doğum səviyyəsinin sabitləşdirilməsi üçün səyləri gücləndirməlidir.

Bu barədə Çin Xalq Respublikasının Sədri Si Cinpin bildirib. O vurğulayıb ki, nikah və uşaq dünyaya gətirmə ilə bağlı fəal baxış təşviq edilməli, yeni doğulanların sayının sabitləşdirilməsi istiqamətində səylər göstərilməlidir.

Si Cinpin konkret tədbirlər sırasında doğumun dəstəklənməsi sisteminin gücləndirilməsini, uşaqların tərbiyə və təhsili zamanı ailələrin yükünün azaldılmasını, həmçinin uşağa qulluq üzrə məzuniyyət sisteminin təkmilləşdirilməsini qeyd edib.

Bildirək ki, son illərdə Çin hakimiyyəti doğum səviyyəsinin artırılması üçün davamlı tədbirlər həyata keçirir. Hökumət azyaşlılara qulluq sistemini genişləndirir, uşaq dünyaya gətirmək üçün əlverişli sosial mühit formalaşdırmağa çalışır, təhsil, mənzil və məşğulluq sahələrində vətəndaşlara dəstəyi artırır.

2022-ci ildə Çinin əhalisi son 60 ildə ilk dəfə olaraq azalmağa başlayıb və 850 min nəfər azalıb. 2023, 2024 və 2025-ci illərdə isə azalma müvafiq olaraq 2,08, 1,39 və 3,39 milyon nəfər təşkil edib.