Çin kosmosdakı mövcudluğunu artırır | ABŞ generalından xəbərdarlıq

ABŞ rəsmiləri hesab edir ki, Çinin kosmosdakı fəaliyyətləri ən narahatedici hərbi addımlardan biridir.

Bu barədə ABŞ Kosmik Qüvvələrinin komandanı general-leytenant Duqlas Şiss Merilend ştatında keçirilən Hava və Kosmik Qüvvələr Assosiasiyasının illik konfransında bildirib.

Onun sözlərinə görə, Çin inanılmaz sürətlə hərbi-kosmik imkanlarını artırır və ABŞ üçün əsas təhlükəyə çevrilib: "Onlar potensiallarını demək olar ki, hər ay gücləndirirlər və bu, bizim aktivlərimizi risk altına salır. Çin açıq şəkildə bizim ən böyük təhlükəmizdir”.

Şiss əlavə edib ki, Çin "məhv zənciri” adlandırılan və ABŞ-nin dəniz, quru və hava qüvvələrinə uzaq məsafədən zərbə endirməyə imkan verən sistem qurur. Kosmos isə bu məsafələri daha da artırmaq üçün əsas vasitəyə çevrilir. Bundan başqa, Çin əks-kosmik imkanlar yaradaraq ABŞ-nin peyklərinə və digər obyektlərinə təhdid yaradır.

ABŞ kəşfiyyatına görə, Çin Ordusu bu addımları ABŞ-nin mümkün regional müdaxiləsini məhdudlaşdırmaq və çəkindirmək məqsədilə atır.

Mövzu ilə bağlı "Demokratiyaların müdafiəsi fondu"nun hərbi-siyasi güc mərkəzinin direktoru Bredli Bouman da xəbərdarlıq edib: "Kosmos bizim kəşfiyyat, müşahidə və hədəf təyinatı imkanlarımızı gücləndirən ən yüksək məkan bizim gözlərimiz və qulaqlarımızdır. Əgər rəqiblərimiz bu sahədə üstünlük əldə etsələr, bu, son dərəcə təhlükəlidir”.

Onun fikrincə, Çin ABŞ-nin kosmosdakı imkanlarını sıradan çıxarsa və ya üstələsə, bu, xəbərdarlıqların azalmasına, əməliyyatların çətinləşməsinə və nəticədə döyüşdə, hətta müharibədə məğlubiyyətə gətirib çıxara bilər.

Şiss bildirib ki, ABŞ Ordusu öz qüvvələrini qorumaq üçün orbitə daha çox peyk, xüsusən də kəşfiyyat və müşahidə peykləri çıxarmağa davam etməlidir.