Çin Tayvana görə ABŞ-yə sərt xəbərdarlıq etdi

Çin ABŞ Konqresinin nümayəndələrinin Tayvana səfərinin və Vaşinqtonla ada arasında istənilən rəsmi əlaqənin əleyhinədir.

Bu barədə məlumatı Çinin ABŞ-dəki səfirliyinin sözçüsü Liu Penqyu bildirib.

“Tayvan Çinin ayrılmaz hissəsidir. Çin ABŞ-nin Tayvan regionu ilə hər hansı formada rəsmi təmasına qəti şəkildə qarşıdır” deyən diplomat Vaşinqtonu “vahid Çin” prinsipinə riayət etməyə çağırıb.

Liu Penqyu həmçinin bildirib ki, ABŞ Tayvanla bağlı məsələləri ehtiyatlı və doğru şəkildə həll etməli, bölgə ilə rəsmi əlaqələri, Tayvanın “müstəqilliyinə” dair yanlış siqnallar göndərməyi dayandırmalıdır.

Qeyd edək ki, may ayında ABŞ Konqresinin Nümayəndələr Palatasının üzvlərinin Tayvana səfəri gözlənilir. Bu barədə açıqlamanı Nümayəndələr Palatasının spikeri Mayk Conson verib.