Çindən ABŞ-yə qarşı təxribat : iki çinli saxlanıldı

ABŞ-nin Nyu-York ştatında Çin Xalq Respublikasının “forpostu” kimi fəaliyyət göstərən ofisin iki işçisi saxlanılıb.

Qeyri-qanuni fəaliyyət göstərdiyi məlum olan ofisə basqın edilib. Hər iki şəxsin Çin İctimai Təhlükəsizlik Nazirliyinə məlumat ötürdüyü iddia edilir. Sözügedən şəxslər həm də məlumatların göndərilməsi ilə bağlı dəlilləri yox etməkdə ittiham olunublar.

“İttihamlar Çin hökumətinin xalqımızın suverenliyini açıq şəkildə pozduğunu göstərir”. Bu sözləri ABŞ-nin Nyu-York Şərq Bölgəsi üzrə prokuroru Breon Peace Ədliyyə Departamenti və Federal Təhqiqat Bürosu tərəfindən Bruklin Federal Məhkəməsində keçirilən mətbuat konfransında deyib.

Rəsmilər bildiriblər ki, ofisdə çalışan şəxslərin Bronks sakini 61 yaşlı Lu Jianvanq və Manhettendə yaşayan 59 yaşlı Çen Jinpinq olduğu müəyyən edilib. Saxlanılan şəxslər Bruklində məhkəmə qarşısına çıxarılacaq.