Çinli tibb ekspertləri Kinşasaya eniş ediblər

Konqoda Ebola qızdırmasından laboratoriya şəraitində təsdiqlənmiş ölüm hallarının sayı 101-ə çatıb.

Bu barədə ölkənin Səhiyyə Nazirliyi məlumat yayıb.

Hazırkı epidemiya zamanı virusa yoluxanların ümumi sayı 550 nəfərə yüksəlib. Bir gün əvvəl isə bu göstəricilər 91 ölü və 515 yoluxma faktı təşkil edirdi.

Ebolanın yayılmasına qarşı mübarizədə kömək etmək üçün xarici ölkələrdən tibb mütəxəssisləri Konqoya gəlməyə başlayıblar.

Konqonun rabitə və media işləri üzrə naziri Patrik Muyyayi Katembvenin sözlərinə görə, çinli tibb ekspertlərindən ibarət qrup paytaxta eniş edib.

"Onların tibbi yardım göstərmək və Ebola epidemiyasına qarşı yerli səyləri dəstəkləmək məqsədi daşıyan missiyasının müddəti üç ay üçün nəzərdə tutulub", – deyə o bildirib.

Ebola qızdırmasının hazırkı epidemiyası ötən ay Konqo və Uqanda ərazisində başlayıb. Ekspertlər xəbərdarlıq edirlər ki, bu epidemiya son onilliklərin ən böyük və dağıdıcı dalğalarından birinə çevrilə bilər.