Crocus terrorunda Seyfulla detalı | Şübhəlilər hər şeyi danışdı

Moskva vilayətində yerləşən “Crocus City Hall”da terror aktı törətməkdə şübhəli bilinənlər Rusiya telekanallarından birinə açıqlama veriblər.

Terror hadisəsinin planlanmasından danışan şəxslər bildiriblər ki, onlar ukraynalı kuratorlarının tapşırığı ilə hücuma keçiblər.

Saxlanılan şəxslər açıqlamalarında plana əsasən hadisəni törətdikdən sonra Kiyevə qaçmalı olduqlarını qeyd ediblər.

Bildiriblər ki, onlar “Crocus City Hall”dan çıxdıqdan sonra yol boyu terror qruplaşmasının “Seyfulla” ləqəbli digər üzvü ilə əlaqə saxlayıblar. Məlumata görə, məhz həmin şəxs hücum hədəflərini müəyyənləşdirib və silahların haradan götürülməsi barədə tapşırıqlar verib.

Təqsirli bilinənlərdən biri etirafında onu da deyib ki, “Seyfulla” onlara Rusiya-Ukrayna sərhədinə çatdıqda avtomobillərini yandırmaqlarını, daha sonra onunla əlaqə yaratmaqlarını tapşırıb. Onun sözlərinə görə, “Seyfulla” daha sonra sərhəddə onları gözləyənlərin olduğunu və Kiyevə keçmək üçün yardım edəcəklərini deyib.

Bundan başqa, o da məlum olub ki, hadisəni törədən şəxslərin hər birinə bir milyon rubl verilməli idi.

Qeyd edək ki, mobil telefonlarında aparılan axtarış zamanı terrorçuların hadisədən öncə və sonra bir neçə dəfə Ukrayna ərazisində olan şəxslərlə danışdıqları müəyyən edilib. Bundan əlavə, telefonda “Crocus City Hall”un ümumi görüntüsü, giriş və arxa hissəsi əks olunan fotolar da olub.