Daşkənddə 30 km-dən hiss edilən partlayış: onlarla yanğınsöndürmə maşını gəldi

Özbəkistanın paytaxtı Daşkənddə hava limanının gömrük anbarı ərazisində güclü partlayış baş verib. Hadisə yerinə dərhal təcili tibbi yardım briqadaları cəlb olunub.

Bu barədə yerli KİV məlumat yayıb. Bildirilib ki, partlayış dalğası episentrdən 30 km-ə qədər məsafədə hiss olunub. Hadisə nəticəsində geniş ərazini alov bürüyüb, ərazidəki evlərə və ictimai iaşə obyektlərinə ciddi ziyan dəyib.

“Sentyabrın 28-də saat 02:43 radələrində Fövqəladə Hallar Nazirliyinin növbətçi şöbəsinə Daşkənd şəhərinin Sergeli rayonunda “İnşaatçılar” massivinin ərazisində yerləşən anbarlardan birində partlayış və ardınca yanğın baş verməsi barədə məlumat daxil olub”, – deyə məlumatda qeyd olunub.

Ölkənin Fövqəladə Hallar Nazirliyindən bildirilib ki, ölən və xəsarət alanlar barədə hələlik məlumat daxil olmayıb.