Demokrat partiyası hökuməti korrupsiyada ittiham edir | Albaniya

Albaniyanın paytaxtı Tiranada müxalifətin etiraz aksiyası baş tutub.

Polis Daxili İşlər Nazirliyinə doğru yürüş edən etirazçıları dağıtmaq üçün gözyaşardıcı qaz və su şırnağından istifadə edib. Yaranan iğtişaşlar zamanı bəzi nümayişçilər hüquq-mühafizə orqanlarının əməkdaşlarına qarşı “Molotov kokteyli” atıblar.

Demokrat Partiyasının tərəfdarları əvvəlcə Baş nazir Edi Ramanın ofisi qarşısında toplaşaraq onun istefasını tələb ediblər. Daha sonra nazirliyə doğru hərəkət etsələr də, iğtişaşlara qarşı təchiz olunmuş polis qüvvələri onların qarşısını kəsib.

Müxalifət nümayəndələri hökuməti korrupsiyada ittiham edir.

Qeyd edək ki, ölkədə siyasi gərginlik ötən ilin dekabrından etibarən artıb. Xüsusi prokurorluq Baş nazirin müavinini iri infrastruktur layihələri üzrə tenderlərə müdaxilə etməkdə və bəzi şirkətlərə üstünlük verməkdə ittiham edib.

Xatırladaq ki, Albaniya 2030-cu ilə qədər Avropa İttifaqına üzv olmağı hədəfləyir. Avropa İttifaqı isə ölkədən korrupsiya və mütəşəkkil cinayətkarlıqla mübarizənin gücləndirilməsini tələb edir.