Demokrat senator Ukrayna ilə bağlı sülh planını tənqid etdi

Demokrat senator Mark Vorner ABŞ Prezidenti Donald Trampın Ukrayna ilə bağlı təklif etdiyi sülh planını kəskin tənqid edib.

Siyasətçi təşəbbüsü “tarixi cəhətdən pis razılaşma” adlandırıb və İkinci Dünya müharibəsi ilə tarixi paralellər aparıb.

Mark Vorner vurğulayıb ki, sənəd Ukraynanın tam kapitulyasiyasını nəzərdə tutur və 1938-ci ildə İkinci Dünya müharibəsi başlamazdan əvvəl Adolf Hitlerin tələblərinə boyun əyən Nevil Çemberlenin məşhur sakitləşdirmə cəhdinin analoqu ola bilər.

Senator qeyd edib ki, sülh planının ilkin variantı ancaq Rusiyanın mövqeyi nəzərə alınmaqla hazırlanıb, lakin Ukraynanın maraqları nəzərə alınmayıb. Donald Tramp Administrasiyasının dəyişikliklərlə bağlı açıqlamalarına baxmayaraq, Mark Vorner söyləyib ki, Prezident sənədin yekun olub-olmaması ilə bağlı fikirləşir.

“Nəhayət, hamımız sülh istəyirik, amma Kreml sahibi Vladimir Putini mükafatlandıran sülh deyil”, – o əlavə edib.