Donald Tramp Si Cinpinlə razılaşdığını açıqlayıb

“TikTok”la bağlı razılaşmamız var”. Bunu ABŞ Prezidenti Donald Tramp jurnalistlərə açıqlamasında deyib.

D.Tramp “TikTok”u alacağını, Çin sədri Si Cinpinlə razılığa gəldiyini bildirib.

Donald Trampın “TikTok”la bağlı bu açıqlaması həm texnoloji, həm siyasi, həm də geosiyasi müstəvidə ciddi nəticələrə səbəb ola bilər.

Əgər D.Trampın dediyi kimi, “TikTok” ABŞ şirkəti tərəfindən alınarsa və razılaşma Çinlə təsdiqlənərsə, bu, “TikTok”un ABŞ bazarında bağlanmasının qarşısını alacaq. Bu həm ABŞ istifadəçiləri, həm də “TikTok”un bazar payı üçün müsbət nəticədir.

Son zamanlar D.Tramp Administrasiyası Çin texnologiya şirkətlərinə qarşı sərt mövqe sərgiləyir. D.Trampın bu addımı dünya iqtisadiyyatında yeni bir ənənənin əsasını qoya bilər.

Güclü ölkələr nüfuzlu beynəlxalq şirkətləri zor gücünə ala bilərlər ki, bu, qlobal iqtisadi sistemdə etimad mühitinə ciddi xələl gətirər. Bu, ABŞ-nin daxili siyasi vəziyyətinə də təsir göstərəcək.

“TikTok” gənclər arasında çox məşhurdur və bu platforma ilə bağlı addımlar həm təhlükəsizlik, həm də milli maraqlar adı altında siyasi kapital kimi istifadə olunur. Bu baxımdan Donald Tramp qarşıdakı ən böyük problemlərdən birindən qurtulmağa hazırlaşır.

“TikTok” məsələsi eyni zamanda iki ölkə arasında texnoloji müharibənin bir hissəsidir. Əgər Çin bu razılaşmanı öz texnoloji suverenliyinə təhdid kimi görərsə, cavab addımları atıla bilər. Məsələn, ABŞ şirkətlərinə qarşı məhdudiyyətlər, ya da qarşılıqlı diplomatik reaksiyalar meydana gələr.

Hər halda Çin “TikTok”u ABŞ-yə verməsə, Ağ Evin müttəfiqi və təsiri altında olan bəzi ölkələr “TikTok”a qadağa qoya bilərlər, bu isə Çinə sərf etmir.