Donald Trampdan Nyu-York merinin açıqlamasına cavab

"İsrailin Baş naziri Benyamin Netanyahunun ABŞ-də Beynəlxalq Cinayət Məhkəməsinin qərarı ilə həbsi ilə bağlı heç bir təhdid yoxdur".

Bunu ABŞ Prezidenti Donald Tramp öz "Truth Social" hesabında yazıb.

"Benyamin Netanyahu Amerika Birləşmiş Ştatlarında olduğu müddətdə heç bir şəkildə və ya formada həbs olunmayacaq", – deyə Donald Tramp Nyu-York meri Zohran Mamdaninin açıqlamalarını şərh edərkən bildirib.

Bu bəyanat Nyu-Yorkun meri Zohran Mamdaninin "The New York Times" qəzetinə verdiyi açıqlamadan sonra səslənib.

Mer sentyabr ayında BMT Baş Assambleyasının iclasında iştirak etmək üçün gələcəyi təqdirdə İsrailin Baş nazirinin həbs olunması ehtimalı ilə bağlı şəhər hüquq-mühafizə orqanları ilə aktiv danışıqlar apardığını bildirmişdi.

Donald Tramp qeyd edib ki, İsrailin Baş naziri qısa müddət əvvəl günahsız etirazçıları qətlə yetirən və son 47 ildə amerikalı əsgərləri məhv edən İrana qarşı mübarizə aparır.

Tramp həmçinin İranı bu misli görünməmiş ölüm və dağıntı spiralına sürükləyənlərin məsuliyyətə cəlb olunmalı olduğunu vurğulayıb.