Dünyanı alt-üst edəcək xəbər | Hansı ölkələr müharibəyə hazırlaşır?

2024-cü ilin mürəkkəb il olacağını indidən demək olar. Yaxın Şərqdəki toqquşmalar və Rusiya-Ukrayna müharibəsi gələn il də davam edəcək.

“Bloomberg” agentliyinin araşdırmasında dünyada müharibələrin coğrafiyasının genişlənəcəyi proqnozlaşdırılıb.

Qeyd olunub ki, ABŞ, Cənubi Koreya və Yaponiya liderləri ilk dəfə Vaşinqtonda görüşüb və geniş fikir mübadiləsi aparıblar. Bununla Amerika Birləşmiş Ştatları, Cənubi Koreya və Yaponiya öz aralarında müttəfiqliyi rəsmiləşdiriblər. Halbuki, keçmiş illərdə Tokio ilə Seul arasında münasibətlərdə müəyyən suallar yaranırdı.

Əsas təhlükə Şimali Koreyanın raket proqramı ilə bağlıdır. Şimali Koreya raket sınaqlarını davam etdirməklə qonşuları Cənubi Koreya və Yaponiya üçün ciddi təhdidlər yaradıb. Bu, Vaşinqtonu da narahat edir. Çünki ABŞ-nin həm Cənubi Koreyada, həm də Yaponiyada hərbi bazaları mövcuddur. Bu o deməkdir ki, Şimali Koreya Cənubi Koreya və ya Yaponiyaya raket atarsa, ABŞ Pxenyana qarşı müharibəyə başlamalı olacaq.

Analizdə digər təhlükə kimi Çinin bölgədə artan hərbi gücü vurğulanıb:

“Çin və Şimali Koreya bölgəyə Qərblə gərgin münasibətləri olan Rusiyanı da cəlb etməyə çalışır. Misal üçün, Rusiya Ukraynaya qarşı işğalçı müharibəni davam etdirmək məqsədilə Şimali Koreyadan raketlər alır, Çinlə birgə dənizlərdə hərbi təlimlər keçirir. Bu hərbi təlimlər ən çox Yaponiyanı narahat edir. Çünki hərbi təlimlər Yaponiya sahillərinə yaxın ərazilərdə keçirilir”.

Hazırda planetdə 183 regional silahlı münaqişə qeydə alınıb. Araşdırmalarda münaqişələrin intensivliyinin ildən-ilə artdığı vurğulanıb. Bu müharibələr ölüm sayının artmasını da şərtləndirir.