Dünyaya səs salacaq xəbər | Bu silahlı qrup kimlərə qarşı mübarizə aparacaq?

Suriyada “İslami-Müqavimət” adlı yeni silahlı qrup yaradılıb. Təşkilat xarici müdaxiləyə və işğala qarşı mübarizəyə hazır olduğunu bəyan edir.

Bu barədə İsrail mediası məlumat yayıb.

Qeyd edilib ki, yeni təşkilatın rəmzləri birbaşa SEPAH və “Hizbullah”a işarə edir ki, bu da onun Tehranla sıx bağlı olduğunu göstərir:

“Təşkilat bəyan edib ki, Suriya əhalisinin bütün təbəqələrini təmsil edəcək və ölkənin müdafiəsinə töhfə verəcək. Lakin əslində, bu birləşmənin yaradılması İranın bölgədəki hərbi varlığını gücləndirmək və İsrailin mövqelərinin möhkəmlənməsinin qarşısını almaq məqsədi daşıyır.

“Mehr” agentliyi təşkilatın Bəşər Əsəd rejiminin süqutundan sonra yaranan hakimiyyət boşluğu fonunda formalaşdığını yazıb. Bu, İrana Suriyada fəaliyyətini gücləndirmək imkanı verir.

Terror qruplaşması öz məqsədini “Suriyanı işğaldan qorumaq” kimi təqdim etsə də, əslində, İranın təsir vasitələrindən biri olacaq və İsrailə qarşı mübarizə aparacaq.

İsrail SEPAH və onun dəstəklədiyi silahlı birləşmələrlə bağlı obyektlərə dəfələrlə hava zərbələri endirib və İran hərbi qüvvələrinin Suriyada möhkəmlənməsinin qarşısını almağa çalışıb.

Livan və Suriyada İsraillə iranyönlü qüvvələr arasında davam edən qarşıdurma fonunda yeni qrupun yaradılması münaqişənin genişlənməsinə və regionda gərginliyin artmasına səbəb ola bilər”.