Ekspertlər iqtisadiyyatın çox böyük ziyan çəkdiyini bildirir

Almaniya iqtisadiyyatı istidən çox böyük ziyan çəkir.

Bunu federal ətraf mühit naziri Karsten Şnayder deyib.

Alman nazir bildirib ki, ölkə hələ də getdikcə daha tez-tez baş verən isti dalğalarına yaxşı hazır deyil və adaptasiya 20-25 il çəkəcək.

Karsten Şnayder həmçinin xəbərdarlıq edib ki, suya çıxış gələcəkdə biznes yeri seçərkən əsas amil ola bilər.

"Yeraltı su səviyyəsinin aşağı düşməsi və göllərin quruması artıq sənayeyə təsir göstərir. Bu problem xüsusilə yüksək su istehlakı olan irimiqyaslı sənaye sahələri üçün kəskindir. Bu, yalnız suyun 10 və ya 20 il davam edib-etməyəcəyi məsələsi deyil, həm də sosial qəbul məsələsidir. İnsanların qıtlıqdan qorxduqları yerdə müqavimət artır", – deyə Almaniyanın federal ətraf mühit naziri Karsten Şnayder bildirib.

Qeyd edək ki, Almaniyanın Meteorologiya Xidməti ardıcıl üç gündür ki, temperatur rekordları qeydə alır. İyunun 28-də saat 16:00 radələrində Almaniya-Polşa sərhədində, Brandenburq əyalətinin Koşen yaşayış məntəqəsində 41,7 dərəcə temperatur qeydə alınıb. Meteoroloqların fikrincə, bu, son hədd deyil. Termometrlərin göstəricisi daha da yüksələ bilər.

Bundan əlavə, iyunun 28-nə keçən gecə Almaniyada meteoroloji müşahidələr tarixinin ən isti gecəsi olub. Belə ki, Şərqi Saksoniyada gecə temperatur 29,4 dərəcə təşkil edib.