Ekspertlər Ukraynadakı SES-in partladılmasını şərh etdi

“Novaya Kaxovkada su elektrik stansiyasının bəndinin partlaması Buxarestdə maqnitometrdə qeydə alınıb. Su anbarı nə özünü məhv etmə, nə də hava hücumu yolu ilə partladılıb”.

Bu sözləri fizika üzrə professor, tədqiqatçı Riçard Kordaro öz “Twitter” hesabında yazıb.

O, bu paylaşımı ilə rəsmi Moskvanın su elektrik stansiyasının Ukrayna Silahlı Qüvvələri tərəfindən partladılması ilə bağlı iddiasını rədd edib. Professor qeyd edib ki, hadisədən bir neçə saat əvvəl həmin ərazidə daha kiçik partlayışlar qeydə alınıb.

Sözügedən məsələni rusiyalı və ukraynalı ekspertlər Baku TV-yə şərh ediblər. Rusiyalı hərbi ekspert Yevgeni Mixaylov su elektrik stansiyasında terror aktının Ukrayna tərəfindən həyata keçirildiyini deyib.

“Bu, Rusiya Silahlı Qüvvələrinin apardığı xüsusi hərbi əməliyyatlar zamanı uğur qazandığı ərazidə vəziyyəti gərginləşdirmək məqsədi daşıyır. Bundan öncə də Kaxovka SES Ukrayna tərəfindən dəfələrlə atəşə məruz qalıb və nəticə etibarı ilə o, qismən dağıdılmışdı. Ölkəmizə qarşı yönələn bütün ittihamlar cəfəngiyyatdır. Bu hadisədə məsuliyyət daşıyan insanlar gec-tez ciddi şəkildə cəzalandırılacaqlar”, – deyə rusiyalı hərbi ekspert qeyd edib.

Ukraynalı siyasi-hərbi ekspert Aleksandr Kovalenko isə bildirib ki, Rusiya hələ 2022-ci ildən başlayaraq Kaxovka SES-ə genişmiqyaslı hücum həyata keçirməyi planlaşdırırdı: “Onlar SES-in ərazisinə dəfələrlə mina və digər partlayıcı maddələr daşıyırdılar ki, lazımi vaxtda həmin bombalardan istifadə edərək Ukrayna Silahlı Qüvvələrinin hücumunun qarşısını ala bilsinlər. Bu hadisə açıq-aşkar Rusiya tərəfinin törətdiyi terror aktıdır”.