“Elə vəhşicəsinə hücum oldu ki...” | Pezeşkian BMT tribunasından hansı mesajları verdi?

“Son iki il ərzində dünya Qəzza zolağında yaşanan soyqırımın şahidi olub. Livanda evlərin dağıdılması, suverenliyin və ərazi bütövlüyünün dəfələrlə pozulması, Suriyanın infrastrukturunun məhv edilməsi, Yəmən xalqına hücumlar, analarının qucağında qəsdən yeməksiz, ac qalan uşaqları gördük”.

Bu sözləri İran Prezidenti Məsud Pezeşkian BMT Baş Assambleyasının 80-ci sessiyasındakı çıxışı zamanı deyib.

“Siz hamınız şahid oldunuz ki, ötən ilin iyununda ölkəmə necə vəhşicəsinə hücum edilib, beynəlxalq hüququn fundamental prinsipləri pozulub. Diplomatik danışıqlarda irəliləyiş əldə etdiyimiz bir vaxtda İranın şəhərlərinə, evlərinə və infrastrukturuna qarşı hava hücumları həyata keçirildi. Bu da diplomatiyaya qarşı böyük bir xəyanətdir.

Çoxsaylı komandirlərin, mülki şəxslərin, uşaqların, qadınların, alimlərin və ölkənin elmi elitasının həyatına son qoyan bu açıq-aşkar təcavüz beynəlxalq etimada və regionda sülhün bərqərar olması perspektivlərinə ağır zərbə vurdu.

Bu cinayəti törədənlər bilməlidirlər ki, dünyanın ən qədim sivilizasiyası olan İran tarixin tiranlarına qarşı həmişə möhkəm dayanıb. Sarsılmaz ruhu, dönməz qətiyyəti ilə bu ölkə təcavüzkarlara boyun əyməyəcəyini dəfələrlə sübut edib.

Bu gün biz inamla, milli birliklə işğalçılara qarşı qürurla dayanırıq. Mən bu toplantıda bir daha təkrar edirəm ki, İran heç vaxt nüvə silahı əldə etməyə çalışmayıb. İran həmişə kütləvi qırğın silahlarından azad Yaxın Şərqin tərəfdarı olub”, – deyə İran Prezidenti qeyd edib.