Əlimizdən gələni edəcəyik ki... | Orban gürcü xalqının qərarını dəstəklədi

“Heç kim öz ölkəsini dağıtmaq, mənasız müharibəyə qarışmaq istəmir. Ona görə də biz sülh istiqamətində seçim edən gürcü xalqının verdiyi qərarı dəstəkləyirik”.

Bunu Tbilisidə səfərdə olan Macarıstanın Baş naziri Viktor Orban həmkarı İrakli Kobaxidze ilə görüşdən sonra mətbuata birgə açıqlamasında deyib.

“Gürcüstan hökumətini təbrik etmək istərdim. Siz Avropayönlü siyasət həyata keçirdiyiniz bir şəraitdə ölkənizin ikinci Ukraynaya çevrilməsinə imkan vermədiniz. Biz Baş nazirin bu ideyaya sadiqliyini çox yüksək qiymətləndiririk. Biz sizə kömək etmək üçün əlimizdən gələni edəcəyik”, – o bildirib.

V.Orban oktyabrın 26-da Gürcüstanda keçirilən parlament seçkilərindən də danışıb. Bildirib ki, seçkilərin demokratik şəraitdə keçdiyini heç kim inkar edə bilməz.

“Avropada bələ mübahisələr bundan sonra da olacaq, bunu ciddi qəbul etmək lazım deyil. Əgər liberallar qalib gəlirsə, Brüsseldə deyirlər ki, demokratiya var. Mühafizəkarlar qalib gəlirsə, demokratiyanın olmadığını bildirirlər. Bu, adi haldır”, – deyə o vurğulayıb.