Ən bahalı silahlar Ukrayna və... | Ölkələr silahlara nə qədər xərcləyir?

Hərbi sənaye şirkətləri qarşıdakı üç il ərzində rekord gəlir əldə edəcəklər. “Financial Times” iddia edir ki, müdafiə sahələri üzrə 15 aparıcı şirkətin gəlirləri 2026-cı ilə qədər 52 milyard dollara qədər artacaq. Bu da 2021-ci ilin sonu ilə müqayisədə iki dəfə çoxdur.

Hərbi sənaye gəlirlərinin artması üçün əsas səbəb Ukraynadakı müharibə və Yaxın Şərqdəki gərginlik göstərilir. Üstəlik, müasir müharibələr ən yeni texnologiyaların tətbiqi əsasında yaradılan silahlarla aparılır. Bu da müharibələri daha bahalı edir, xüsusilə Ukrayna və İsrail ordusunda daha bahalı silah və sursatlardan istifadə edilir.

Məsələnin digər tərəfi silah sənayesinin ölkə iqtisadiyyatlarında aparıcı rol oynamasıdır. Məsələn Almaniyada 2022-ci ildə ordunun modernləşdirilməsi üçün 100 milyard avroluq xüsusi fond yaradılıb. 2024-cü ildə isə ölkə müdafiə sahəsinə 73,41 milyard dollar xərcləyəcək ki, bu da proqnozlaşdırılan ÜDM-in 2 faizini aşır.

Böyük Britaniyanın müdafiə naziri Con Hili də hərbi xərclərin ÜDM-in 2,5%-nə qədər artırılmasının tərəfdarı olduğunu bildirib. Digər tərəfdən, Tayvan Silahlı Qüvvələri ABŞ ilə adada Amerika silahlarını istehsal etməyi planlaşdırır. NATO ölkələrinin müdafiə xərclərini ÜDM-in 2 faizini təşkil etməsi ilə bağlı razılıqları var. Alyans üzvləri arasında Yunanıstan, Polşa və ABŞ hazırda ümumdaxili məhsulun hətta üç faizdən çoxunu hərbi xərclərə ayırır.