Entoni Blinken İsrail prezidenti ilə hansı məsələləri müzakirə etdi?

ABŞ dövlət katibi Entoni Blinken İsrail-HƏMAS münaşiqəsi başlayandan dördüncü dəfədir ki, Təl-Əvivə səfər edib.

Bu barədə İsrail Prezident Ofisi və Nazirlər Kabinetinin mətbuat xidmətləri məlumat yayıb.

Bildirilib ki, dövlət katibi paytaxtda Prezident İsxaq Hersoq və Baş nazir Benyamin Netanyahu ilə görüşüb. Entoni Blinken müvəqqəti atəşkəsin nəticə verəcəyinə və davamlı olacağına ümid etdiyini qeyd edib.

Ölkə rəhbəri isə bildirib ki, İsrail bütün girovların dərhal azad edilməsi üçün çalışır, hətta nəinki dua, tələb belə edir. O, öz növbəsində Amerika Birləşmiş Ştatlarına İsrail hökuməti adından girovların azad edilməsi üçün əlindən gələni əsirgəmədiyinə görə təşəkkür edib.

Görüşdə həmçinin Qüdsdə noyabrın 30-da səhər saatlarında baş verən terror aktı da müzakirə edilib. E.Blinken hadisə nəticəsində həyatını itirən insanların ailələrinə başsağlığını çatdırıb.

Dövlət katibi həmçinin Ağ Evin İsraili və onun özünü müdafiə etmək hüququnu dəstəklədiyini və 7 oktyabr hadisələrinin bir daha təkrarlanmaması üçün əlindən gələni edəcəklərini dilə gətirib.

İsrailin prezidenti İsxaq Hersoq isə sonda qeyd edib ki, HƏMAS-a qarşı mübarizə daha da gücləndiriləcək.