"Epşteyn işi"ndə adı keçən 300-dən çox nüfuzlu şəxsin siyahısı dərc edilib

ABŞ-nin Baş prokuroru Pem Bondi amerikalı maliyyəçi Cefri Epşteynin işi ilə bağlı sənədlərdə adı çəkilən 300-dən çox nüfuzlu şəxsin siyahısını açıqlayıb.

“New York Post” qəzetinin məlumatına görə, siyahıda ABŞ-nin sabiq prezidenti Barak Obama və həyat yoldaşı Mişel Obama, “Microsoft”un qurucusu Bill Geyts, həmçinin ABŞ-nin keçmiş prezidenti Bill Klinton və həyat yoldaşı Hillari Klintonun adları yer alır.

Bundan başqa, sənəddə Böyük Britaniya şahzadəsi Harri, kinorejissor Vudi Allen, ABŞ-nin sabiq vitse-prezidenti Kamala Harris, iş adamı Mark Zukerberq, musiqiçi Bono, müğənni Beyons, aktyor Robert De Niro, Kim Kardaşyan və digər tanınmış şəxslərin də adları çəkilir.

Nəşr qeyd edir ki, bu sənədlərdə adın hallanması hər hansı qanunsuz fəaliyyəti nəzərdə tutmur və bəzi hallarda hətta Epşteynlə birbaşa əlaqənin mövcudluğu da demək deyil.

Qeyd edək ki, daha əvvəl Bill Klintonun mətbuat katibi Anxel Urenya Klintonlar ailəsinin Cefri Epşteyn işi çərçivəsində Nümayəndələr Palatasının nəzarət komitəsinə ifadə verməyə razılıq verdiyini açıqlamışdı.