Erməni etirazçılar Sərdarabada yığışdı, amma... | Keşişlərin növbəti hiyləsi

İrəvanı ağlar günə qoyan keşiş Baqrat Qalstanyan indi də ətrafına topladıqları ilə birlikdə etirazını bildirmək üçün Sərdarabada üz tutub.

Qalstanyanın başçılığı ilə mayın 28-i Ermənistanın respublika gününü qeyd edən bir qrup şəxs paytaxtdan yola çıxaraq gecə saatlarından etibarən Sərdarabadın küçələrinə axışıblar.

Ənənəyə əsasən, hər il olduğu kimi Nikol Paşinyan da ora səfər etməli, şəhərin adını daşıyan döyüşlərdə vəfat edən hərbçilərə həsr olunmuş memorial kompleksi ziyarət etməli, qəbirlərinin üzərinə əklillər qoymalı idi.

Belə görünür ki, keşişin növbəti qalmaqallı oyunundan xəbər tutan Baş nazir fikrindən yayınıb. Bu isə Qalstanyanı daha da hiddətləndirib. Etiraz aksiyası zamanı çıxış edən arxiyepiskop bildirib ki, Nikol Paşinyanın bura gəlməməsinin əsas səbəbi odur ki, o, artıq özünü Ermənistana, bizim adət-ənənələrə aid hesab etmir. Paşinyan bizi iki hissəyə bölüb, tarixi və real Ermənistan. Belə çıxır ki, Sərdarabad onun üçün artıq tarixdə qalıb.

Baqrat Qalstanyanın fikrincə, ikinci səbəb isə ondan ibarətdir ki, Nikol Paşinyan onlarla üz-üzə gəlməkdən qorxur.

Erməni Apostol Kilsəsinin Şirak yeparxiyasının rəhbəri, arxiyepiskop Mikael Adjapaxyan da Baş naziri qorxaqlıqda ittiham edib. O əlavə edib ki, Paşinyan etirazçılarla görüşməkdən yayınır.