Erməni məmurların ölkədən çıxma səbəbi | İrəvan bu xəbərlə çalxalandı

“Ermənistanın yüksəkrütbəli məmurları hamısı birlikdə eyni vaxtda və tezbazar uzunmüddətli məzuniyyətə getməyə qərar veriblər”.

Bu barədə yerli mediada məlumat verilib.

Mətbuatda dövlət xadimlərinin birlikdə istirahətə çıxmaları haqqında məqalə hazırlanıb. Bildirilib ki, Baş nazir Nikol Paşinyan iyulun 15-dən avqustun 10-dək məzuniyyətdə olacaq.

Parlamentin spikeri Alen Simonyan iyulun 16-dan avqustun 5-dək istirahət edəcək. Onu parlamentin sədr müavini Ruben Rubinyan əvəzləyəcək. Maliyyə naziri 10 iş günü, Baş nazirin müavini Mger Qriqoryan 9 günlük məzuniyyətə çıxıb. Xarici işlər naziri Ararat Mirzoyan isə iyulun 22-dək istirahətdədir.

Onların bu qədər uzun müddət məzuniyyətdə olmaları mediada müzakirələrə səbəb olub. Bildirilib ki, bundan öncə məmurlar 1-2 həftə tətilə gedəndə Nikol Paşinyan tribunadan “nə olub, daş daşıyırsınız, niyə məzuniyyətə gedirsiniz?”, – deyə etirazını bildirirdi.

Ermənistan mətbuatında o da qeyd olunub ki, N.Paşinyanın Avropa Siyasi Birliyinin Londonda keçiriləcək 4-cü sammitində iştirakı da gözdən pərdə asmaq üçündür.

“Əsas məqam budur, Baş nazir və onun qohumları istirahətlərini Böyük Britaniyada edəcəklər”, – deyə məlumatda bildirilib.