Erməni xanım Qətərdəki geyiminə görə tənqid atəşinə tutuldu, Akopyan isə dedi ki...

Ermənistanın Baş naziri Nikol Paşinyanın vətəndaş nikahında olduğu həyat yoldaşı Anna Akopyan beynəlxalq səfərlər üçün etik qaydalar toplusunu dərc etdikdən cəmi bir neçə gün sonra onun nümayəndə heyətinin üzvü həmin qaydaları pozub.

Bu baradə Ermənistan mediası yazıb.

Məlumata görə, Qətərə səfər zamanı “Mənim addımım” Fondunun direktor müavini Talin Topalakyan rəsmi tədbirlərdə müsəlman ölkəsinin adət-ənənələrinə zidd olan qısa ətəkdə iştirak edib. Bu hadisə geniş ictimaiyyət tərəfindən tənqid edilib, xüsusilə də nümayəndə heyətinə birbaşa rəhbərlik edən Anna Akopyanın özünün ABŞ səfərindən sonra diplomatik etiket qaydalarına dair təlimat dərc etdiyi nəzərə alınarsa, vəziyyət daha da qəribə görünüb.

Ermənistanın Qətərdəki sabiq səfiri Vaaqn Melikyan bildirib ki, Baş nazirin həyat yoldaşının köməkçisinin Qətər ənənələrinə uyğun olmayan geyimi çox mənfi təəssürat yarada bilər.

Diplomat xatırladıb ki, etiket qaydalarına dair təlimat Akopyan tərəfindən yaxın zamanda dərc edilib. Onun sözlərinə görə, əgər sənəddə göstərilən prinsiplər həqiqətən tətbiq olunsaydı, bu cür vəziyyətlər ümumiyyətlə baş verməzdi.

Melikyanın fikrincə, nümayəndə heyətlərində artıq bir neçə dəfə uyğun olmayan davranış halları olub və bu hallar o qədər tez-tez baş verib ki, əsas qaydaları yazılı şəkildə tərtib etmək zərurəti yaranıb.

Anna Akopyan da vəziyyətə münasibət bildirib və onun təlimatını tənqid edənləri “gəzən, danışan və böyük kompleksləri olan insanlar” adlandırıb. O həmçinin bəzi şəxsləri təlimatda göstərilən prinsipləri öz davranışları ilə uyğunlaşdırmamaqda ittiham edib.

Akopyan Ermənistan mediasını da məsuliyyətsizlikdə günahlandırıb. Onun fikrincə, hakimiyyəti tənqid edən materiallar xaricdə də oxunur və bu cür məqalələrin tərcüməsi digər ölkələrin paytaxtlarına göndərilir ki, bu da Ermənistanın beynəlxalq imicinə zərər verir.