Ermənilər sərhəddə saxlanıldı | Gürcüstan DTX-dən əməliyyat

Ukraynanın Odessa şəhərindən terror aktları törətmək məqsədilə Voronejə göndərilən partlayıcı maddələrlə dolu avtomobil Gürcüstanda saxlanılıb.

Partlayıcıların gətirilməsində Ermənistan vətəndaşlarının da iştirak etdiyi bildirilib.

Məlumatı Gürcüstan Dövlət Təhlükəsizlik Xidməti təsdiq edib. Bildirilib ki, Rusiyaya külli miqdarda partlayıcı maddənin keçirilməsinin qarşısı alınıb.

Təhlükəsizlik Xidmətindən verilən məlumata görə, Ukrayna vətəndaşının idarə etdiyi avtomobilə baxış keçirilərkən ümumi çəkisi 14 kiloqram partlayıcı maddə aşkarlanıb.

İstintaq nəticəsində avtomobilin yanvarın 19-da Ukraynanın Odessa şəhərindən yola düşdüyü, Rumıniya, Bolqarıstan və Türkiyə ərazisindən keçərək “Sarp” gömrük-keçid məntəqəsindən Gürcüstana daxil olduğu məlum olub. Oradan isə “Dəryal” keçidi ilə Rusiyanın Voronej şəhərinə aparılmasının planlaşdırıldığı müəyyən edilib.

Əməliyyat-istintaq tədbirləri nəticəsində partlayıcı vasitələrin Gürcüstana aparılmasında iştirak edən 7 Gürcüstan, 3 Ukrayna və 2 Ermənistan vətəndaşı müəyyənləşdirilib. Gürcüstan Dövlət Təhlükəsizlik Xidməti araşdırmaları davam etdirir.