Ermənilər tezliklə çətin seçim qarşısında qalacaq | Paşinyandan qalmaqallı çıxış

Ermənistanın Baş naziri Nikol Paşinyan İrəvanda ailəsi ilə birlikdə yaşadığı hökumət iqamətgahının binalarının düzgün qızdırılmadığını bildirib.

“Hökumət binaları heç vaxt isinmir. Qazdan istifadə olunur, amma bina qızdırılmır. Soyuğa dözə bilərik, amma sonda donmamaq üçün elektrikli qızdırıcıları işə salmaq qərarına gəlirik. Amma qaz hələ də var, istifadə edirlər və bunun üçün dövlət büdcəsindən pul ödənir”.

“Qolos Armeniya” xəbər verir ki, bu barədə Paşinyan hökumətin iclasında deyib. Onun sözlərinə görə, bu xərcləri şəxsi vəsaitdən ödəmək mümkün deyil.

“İndi görək, buna nə qədər vəsait xərclənib”, – Ermənistanın Baş naziri deyib.

“Qolos Armeniya” yazır ki, Paşinyanın indi bu problemi gündəmə gətirməsi təsadüfi deyil:

“Paşinyan evləri qazın isitməsinin effektivliyini şübhə altına alır. Onun istilik sistemlərinin səmərəliliyi ilə bağlı dediklərindən iki gün əvvəl ilk baxışdan bu mövzuya dəxli olmayan hadisə baş verdi. Belə ki, Ermənistan Mərkəzi Seçki Komissiyası “Ermənistan Respublikasının Avropa İttifaqına üzvlüyü prosesinin başlanması haqqında” qanun layihəsinin müdafiəsi üçün toplanmış 52 351 imzanı etibarlı hesab edib. Beləliklə, qanun layihəsi baxılmaq üçün parlamentə gedəcək və parlamentdə, çox güman ki, müvafiq təsdiqini alacaq.

Paşinyan bu mövzuya toxunaraq qeyd edib ki, Avropa Parlamentinin tribunasından Ermənistanın bu quruma üzvlük istədiyini xatırladıb. Bu isə o deməkdir ki, Ermənistan cəmiyyəti tezliklə çətin seçim qarşısında qalacaq. Bir tərəfdən vizasız gediş-gəlişlə “Avropa cənnətinə” qapıların açılması perspektivləri var. Digər tərəfdə isə Ermənistana qaz tədarükünün dayandırılması, Avrasiya İqtisadi İttifaqına, ümumilikdə Rusiyaya qapıların bağlanması.

Yeri gəlmişkən, burada mövsümilik amili əsas əhəmiyyət kəsb edə bilər. Əgər yayda referendum keçirilərsə, çox güman ki, çoxları vizasız rejimə üstünlük verəcək”.