Erməniləri sevən Solovyovun verilişləri İrəvanda qadağan edildi

Ermənistan Rusiyanın “RTR-Planeta” telekanalında ictimai multipleksdə yayımlanan “Vladimir Solovyovla axşam” və “Vladimir Solovyovla bazar axşamı” müəllif proqramlarının ölkədə yayımını qadağan edib.

Bu barədə ölkənin Televiziya və Radio Komissiyası məlumat yayıb.

Qərarın qəbul edilməsinə səbəb kimi adı çəkilən qurum tərəfindən son vaxtlar qeydə alınan daimi pozuntular göstərilir.

Məlumat üçün bildirək ki, bundan əvvəl də Ermənistanın Televiziya və Radio Komissiyası Rusiya televiziya kanallarının respublika ərazisində yayımı haqqında sazişin müddəalarının pozulması faktını aşkarladıqlarını açıqlayıb.

Məsələyə münasibət bildirən Baş nazir Nikol Paşinyan canlı yayımda vətəndaşların suallarını cavablandırarkən deyib ki, Rusiya telekanalları ölkənin daxili işlərinə qarışır. Baş nazir çıxışının sonunda qarşı tərəfi məsləhətləşmələrə dəvət edib.